(Видео) Украинските сили поминале 15 километри низ гасовод и се појавиле зад руските позиции

Украинските сили спровеле операција во близина на Купјанск, во Харковската област, при што поминале околу 15 километри низ подземни гасоводи за да се инфилтрираат зад руските позиции. Операцијата, со кодно име „Велес“, ја извел Вториот корпус на украинската Национална гарда „Хартија“, во соработка со други украински единици.

Командантот на корпусот, бригадниот генерал Игор Оболенски, изјавил дека украинските сили ги проучувале тактиките на руската војска за користење подземни премини и предвиделе дека ќе се обиде да ги искористи големите гасоводи во Харковската област.

— реклама —

„Русите планираа да ги искористат гасоводите за да навлезат зад нашите позиции. Затоа и самите отидовме под земја“, изјавил Оболенски.

Според соопштението на украинскиот корпус, војниците се движеле низ гасоводите, а потоа го поврзале напредувањето под земја со дејствија на површината, вклучително и напади со беспилотни летала.

— реклама —

Од „Хартија“ тврдат дека за време на операцијата биле заробени повеќе од 30 руски војници, додека руските сили изгубиле повеќе од 100 војници. „Киев индепендент“ не можел независно да ги потврди овие бројки.

— реклама —

Оболенски посочил дека целта била да се спречи движењето на руските војници низ подземните премини, но и да се осуетат нивните тактики на копно и од воздух. Тој додал дека украинските сили ги предвиделе потезите на противникот и развиле тактики за борбени дејствија под земја.

Руските сили и претходно користеле гасоводи за прикриено префрлање војници во близина на Купјанск. Во јануари, украински војници објавиле дека запреле руски напад во кој учествувале околу 50 војници што се обиделе да поминат низ гасоводот „Сојуз“.

Од „Хартија“ неодамна обвиниле и дека руски војници во повлекување во близина на Купјанск користеле цивили како жив штит. Според нивните наводи, меѓу цивилите имало деца и постари лица, кои биле одведени до гасоводот „Шебелинка – Острогожск“ и принудени да влезат во цевката и да се движат кон територија под руска контрола. Украинските војници изјавиле дека не отвориле оган поради присуството на цивили.