Здруженијата за заштита на животните „Корина“ и „Рука-Шапи“ побараа од полицијата да ѝ одреди притвор на државјанка на Македонија која е осомничена дека намерно прегазила куче во Црна Гора.
На видеото објавено на социјалните мрежи се гледа како автомобилот неколку пати со поголема брзина поминува преку животното, а се слушаат и вознемирувачки крици.
Од здруженијата соопштија дека, според нивните информации, осомничената по убиството на животното се обидела да ја напушти Црна Гора, но била спречена од полициски службеници.
По интервенцијата, таа била приведена во полициската станица во Улцињ, а на местото на настанот бил извршен увид.
„Поради бруталноста на извршувањето на кривичното дело, кое веројатно ќе има одек и надвор од границите на Црна Гора, како и поради фактот дека осомничената веќе се обидела да избега, бараме определување притвор поради оправдана опасност од бегство“, наведоа здруженијата во заедничкото соопштение.
Тие предупредија дека доколку ваквите случаи не бидат соодветно санкционирани, може да имаат повеќе последици – создавање слика за земјата како место каде што суровоста кон животните е нормална појава, одбивање на туристи кои имаат љубов и почит кон животните, како и порака дека странски државјани можат да ги прекршуваат законите без последици.
Од здруженијата потсетија дека Кривичниот законик на Црна Гора предвидува казна за лице кое спротивно на прописите ќе убие, повреди, мачи или на друг начин ќе злоставува животно – со парична казна или затвор до две години.
Тие побараа итна и одлучна реакција од институциите, без избегнување на одговорност или каков било повластен третман.
