Филипини ги потресе драматичен инцидент во Сенатот, каде што одекнале пукотници додека сенаторот Роналд дела Роса, кого го бара Меѓународниот кривичен суд, веќе два дена се крие во зградата за да избегне апсење.
Дела Роса, поранешен шеф на полицијата и близок сојузник на поранешниот претседател Родриго Дутерте, е обвинет за злосторства против човештвото поради неговата улога во крвавата антинаркотична кампања, во која беа убиени илјадници луѓе.
Според локалните медиуми, сенаторот драматично избегал од агентите кои се обиделе да го приведат, движејќи се низ ходниците и скалите на Сенатот, пред да стигне до парламентарната сала, каде што добил заштитен притвор од претседателот на Сенатот Алан Питер Кајетано.
Во текот на денот во зградата на Сенатот биле забележани војници вооружени со автоматски пушки, а снимки од хаотичната ситуација објавија локалните телевизии.
Дела Роса претходно ги повика своите поддржувачи да се соберат пред Сенатот.
„Да не дозволиме уште еден Филипинец да биде одведен во Хаг“, изјавил тој на прес-конференција.
Тој истакнал дека не бара насилна поддршка, туку „мирен отпор“ и ги повикал припадниците на армијата и полицијата да покажат дека владата на претседателот Фердинанд Маркос Јуниор не треба да ги предава своите граѓани на странски судови.
Поранешниот претседател Дутерте минатата година беше уапсен во Манила и екстрадиран во Хаг, каде што му се суди за злосторства против човештвото поврзани со „војната против дрогата“.
Според налогот за апсење што го објави МКС, Дела Роса е обвинет дека „одобрувал, толерирал и промовирал“ убиства, обезбедувал оружје и гарантирал неказнивост за извршителите.
