(Видео) Вучиќ лета со автомобил на песната „Хеликоптер“ во ново предизборно видео

Српскиот претседател Александар Вучиќ ја продолжува предизборната кампања со необични видеа во кои главната улога ја има самиот тој. Во најновата објава, неговиот автомобил лета низ облаците додека во заднина се слуша песната „Хеликоптер“ на босанскохерцеговскиот пејач Фазлија. Видеото е изработено со помош на вештачка интелигенција и е објавено само три дена по рекламата во која Вучиќ оди да му прави друштво на постар маж, сценарио што во голема мера потсетува на предизборен спот на израелскиот премиер Бенјамин Нетанјаху од 2015 година.

Двете видеа се дел од кампањата за предвремените парламентарни избори во Србија, закажани за 25 октомври. Вучиќ, кој кон крајот на септември поднесе оставка од претседателската функција, ја предводи изборната листа „Александар Вучиќ – Обединета Србија“ и е кандидат за премиер.

Најновото видео беше објавено на 13 октомври на неговиот профил на Инстаграм. На него се гледа автомобилот на Вучиќ како се движи низ небото, додека во заднина свири песната „Хеликоптер“. Со објавата, тој испрати и порака: „Се гледаме во Заечар“, повикувајќи ги граѓаните на предизборниот собир на неговата партија.

View this post on Instagram

— реклама —

Видеото следува по гласините што се проширија на социјалните мрежи еден ден претходно, според кои Вучиќ на предизборен собир во Крагуевац пристигнал со хеликоптер. Тој ги отфрли овие тврдења, наведувајќи дека низ Србија патува со автомобил. Потоа одлучи да се пошегува со гласините, објавувајќи снимка на која неговиот автомобил буквално лета низ небото.

Претходно истиот ден најави и дека ќе им се обрати на своите следбеници на Инстаграм и Тик-ток од својот „хеликоптер“, како што иронично го нарече автомобилот „Шкода“ со кој патува на предизборните собири.

Само три дена претходно, на 10 октомври, Вучиќ објави поинаква предизборна реклама. Во неа, брачен пар ја отвора вратата од својот дом и го затекнува Вучиќ, кој дошол да му прави друштво на постар маж додека сопружниците заминуваат на патување.

„Баравте некого на кого можете да се потпрете“, вели Вучиќ на почетокот на видеото. Потоа следува разговор со постариот маж, во кој тој зборува за плановите за развој на Србија, вклучително и за изградбата на сообраќајната инфраструктура. Објавата ја придружува пораката: „Зборовите ги претвораме во дела“.

— реклама —

View this post on Instagram

Со рекламата Вучиќ се претставува како личност на која граѓаните можат да ѝ ја доверат грижата за своите блиски и на која можат да се потпрат. Сепак, сценариото набргу привлече внимание поради сличностите со реклама што Нетанјаху ја објави пред повеќе од една деценија.

Израелскиот премиер на 31 јануари 2015 година објави предизборно видео во кое млад брачен пар се подготвува да излезе навечер и чека бебиситерка. Наместо очекуваната личност, на вратата се појавува самиот Нетанјаху.

„Баравте бебиситерка? Го добивте Биби-ситерот“, им вели тој, користејќи го својот прекар Биби. Потоа им објаснува зошто токму нему треба да му ја доверат грижата за децата, истовремено критикувајќи ги тогашните политички противници Ципи Ливни и Исак Херцог, кои ги претставува како несигурна алтернатива.

Сличностите меѓу двете реклами се очигледни. Во двата случаи, политичарот неочекувано се појавува пред домот на граѓани и ја презема улогата на личност од доверба, а разговорот го користи за да испрати политичка порака. Разликата е во тоа што Нетанјаху нуди да ги чува децата, додека Вучиќ му прави друштво на постар маж.

— реклама —

Рекламата на Нетанјаху била дел од кампањата на неговата партија Ликуд за парламентарните избори во 2015 година. Подоцна станала едно од препознатливите обележја на таа кампања и добила американска награда „Поли“ за политичко рекламирање.

Дополнителен интерес за сличностите меѓу двете видеа предизвикуваат врските на кампањата на Вучиќ со израелски стручњаци за политички маркетинг. Меѓу нив е Срјулик Ајнхорн, израелски политички стратег кој работел за партијата Ликуд на Нетанјаху, а во изминатите години соработувал и со Вучиќ и со неговата Српска напредна партија.

Според претходни истражувања на БИРН и израелскиот весник „Хаарец“, Ајнхорн бил вклучен во политичките кампањи на Вучиќ најмалку од 2020 година. Учествувал и во активности насочени кон претставување на Вучиќ пред меѓународната јавност, особено во САД, како значаен државник.

Неговото име се појавило и во израелската афера „Катаргејт“, поврзана со сомневања дека лица блиски до кабинетот на Нетанјаху ги застапувале интересите на Катар. Израелската полиција издала налог за негово апсење, а против него се води истрага.

Сепак, и покрај забележливите сличности меѓу рекламите на Вучиќ и Нетанјаху, нема потврда дека Ајнхорн лично го осмислил новото видео на српскиот политичар или учествувал во неговата изработка.

Во завршницата на кампањата Вучиќ се обидува да им се претстави на гласачите на различни начини. Покрај рекламата во која се прикажува како личност од доверба и видеото со автомобилот што лета, објавен е и спотот „Сосема обично купување во една селска продавница“, во кој настојува да се прикаже како обичен човек, близок до народот.

Заедничко за овие видеа е тоа што вниманието е насочено речиси исклучиво кон Вучиќ, додека неговата партија останува во втор план. Во едно видео тој се претставува како човек на кого може да му се довери грижата за член на семејството, а во друго преку шега одговара на обвинувањата дека патува со хеликоптер.

Дали ваквиот пристап ќе ѝ донесе предност на неговата изборна листа, ќе покаже гласањето на 25 октомври, кога таа ќе се соочи и со студентската листа, која има цел да ја урне неговата власт.