Километарски колони од возила се создадени утрово на граничниот премин „Богородица“ кон Грција, каде што сите седум коловозни ленти се исполнети со автомобили кои чекаат за излез од државата.
Според возачи кои се наоѓаат во колоните, чекањето трае со часови. Еден од нив за „Скопје1“ вели дека на граничниот премин чека веќе четири часа, додека и други возачи сведочат за долги застои и бавно одвивање на сообраќајот.
Од друга страна, последниот извештај на Авто-мото сојузот на Македонија (АМСМ), објавен во 6 часот утринава, покажува значително пократко време на чекање.
„Интензитетот на сообраќај на патните правци надвор од градските средини е зголемен. На ГП Богородица и ГП Дојран се бележи зголемена фреквенција на возила, времето на чекање за излез од државата е околу 30 минути, додека пак на ГП Табановце времето на чекање за влез во државата е околу 20 минути. На останатите гранични премини од македонска страна нема подолги задржувања“, наведува АМСМ.
Разликата меѓу информациите од терен и официјалниот извештај најверојатно се должи на тоа што состојбата на граничниот премин значително се променила по објавувањето на утринскиот билтен на АМСМ.
Поради викендот и летната туристичка сезона, и денеска се очекува зголемена фреквенција на возила кон Грција, а на возачите им се препорачува да сметаат на можни подолги задржувања на граничните премини.
