Политичката реторика дополнително се заострува по поразот на Виктор Орбан во Унгарија, откако од СДСМ продолжија со директни обвинувања кон власта и премиерот Христијан Мицкоски.
Членот на Извршниот одбор на СДСМ, Андреј Жерновски, изјави дека падот на Орбан има директни последици врз политичари во регионот кои, според него, биле дел од поширока мрежа под негова заштита.
„Падот на авторитарниот режим на Виктор Орбан има директни последици не само на целиот регион туку и врз политичари кои беа под директна заштита, а тука спаѓа и Христијан Мицкоски, Орбан Џуниор“, рече Жерновски.
Тој тврди дека германски медиуми потврдиле постоење на „транснационална мрежа“ која, како што наведе, контролира медиуми, финансиски текови и бизнис интереси во регионот.
„Вчера Мицкоски го нарекоа авторитарен политичар, го ставија во група со Вучиќ, Додик и ја нарекоа таа екипа авторитарно братство. Тоа е корумпиран модел, директно спротивставен на европските вредности“, додаде Жерновски.
Според него, ваквата оценка претставува „меѓународна дијагноза“ за актуелната власт, која, како што рече, е лоша вест за владејачката структура, но добра за граѓаните.
