(Видео) Започна целосна реконструкција на мостот „Естакада“ во Скопје

Градоначалникот на Гази Баба, Орце Ѓорѓиевски, информираше дека започнала целосна реконструкција на мостот „Естакада“, една од најважните сообраќајни врски за општината и за Скопје.

Како што посочи, мостот се наоѓа на еден од најфреквентните влезови и излези од главниот град и секојдневно го користат илјадници граѓани, како и голем број товарни возила.

— реклама —

Реконструкцијата опфаќа санација на пристапните рампи на површина од околу 10.000 квадратни метри, при што ќе се отстрани постојниот асфалт и ќе се постават два нови асфалтни слоја. Предвидена е и обнова на самиот мост со нов асфалтен слој.

— реклама —

Покрај тоа, ќе бидат заменети рабниците и капаците на шахтите, ќе се изградат нови асфалтни тротоари, а заштитната пешачка ограда ќе биде исчистена, санирана и повторно обоена.

Вкупната должина на делницата што ќе биде реконструирана изнесува 1,5 километри.

— реклама —

Според Ѓорѓиевски, проектот има за цел да ја подобри безбедноста, поврзаноста и секојдневното функционирање на сообраќајот, а најави дека ќе продолжи и обновата на останатите мостови во Скопје каде што е потребна санација.