Импресивна, но и застрашувачка глетка е забележана во петок наутро во Шила, во Калабрија, Италија, на брегот долж Месинскиот Проток.
Пијавица најпрво се појавила над морето, а потоа брзо се приближила до копното и стигнала до плажата Марина Гранде. Кога пијавицата дошла до брегот, силните налети на ветерот почнале да креваат чадори, лежалки и друга опрема.
На снимките се гледа колку брзо се промениле условите. Пијавицата над морето се движела кон брегот, а само неколку моменти подоцна, чадори и лежалки летале низ воздухот. Капачите и туристите се оддалечиле од крајбрежјето и побарале побезбедно место.
Откако стигнала до копното, пијавицата брзо ослабела и исчезнала. Според досегашните информации, нема повредени, но е причинета материјална штета.
Пијавиците се формираат кога над топлите морски површини ќе се создадат услови за појава на силни ротирачки воздушни струења. Иако најчесто траат кратко, можат да бидат доволно силни за да подигнат и фрлат предмети и да предизвикаат штета кога ќе стигнат до копното.
Овој настан се случува по серијата силни временски непогоди што ја погодија Италија во последните недели, вклучително и силни бури и торнада, при што е пријавена штета на објекти и инфраструктура.
