Најтешките последици од разорниот земјотрес што ја погоди Колумбија се регистрирани во Перејра, еден од главните градови во регионот познат по производството на кафе. Според последните податоци, во градот загинале најмалку 47 лица, додека вкупниот број на жртви во земјата достигна најмалку 111.
На социјалните мрежи се појави снимка од моментот кога една зграда во Перејра целосно се урна за само неколку секунди. Сцената предизвикала дополнителна паника меѓу граѓаните кои по земјотресот излегле на улиците.
Тешко погоден е и Кали, каде што, според градоначалникот Алехандро Едер, се урнале 26 згради. Спасувачките екипи продолжуваат да пребаруваат низ урнатините во потрага по лица кои би можеле да бидат заробени.
Според последниот официјален биланс објавен од колумбискиот претседател Абелардо де ла Есприела, во земјата загинале најмалку 111 лица, а 87 се повредени. Пријавена е штета на 1.575 домови, од кои 37 се целосно уништени.
Земјотресот со магнитуда од 7,4 степени ја погоди западна Колумбија во понеделникот наутро. Епицентарот бил лоциран во близина на Сан Хозе дел Палмар, во департманот Чоко.
Поради размерите на разурнувањата, колумбиските власти прогласија национална катастрофа, а спасувачките служби продолжуваат со пребарувањето на погодените подрачја.
