Украинската престолнина Киев утрово повторно беше цел на жесток руски напад со беспилотни летала, при што се регистрирани директни удари и пад на остатоци од соборени дронови во повеќе делови од градот.
Според градоначалникот Виталиј Кличко и градската воена управа, украинската противвоздушна одбрана активно дејствувала додека руските дронови прелетувале над различни квартови.
Во Печерскиот округ, во централното градско подрачје, остатоци од соборен дрон паднале на нестамбена локација и оштетиле спортски објект. Истовремено, на социјалните мрежи се појавија снимки од густ црн чад во близина на познатиот стадион „Валериј Лобановски“.
Една жителка на Киев објавила дека дрон паднал во близина на стадионот, додавајќи дека самиот објект, според нејзините информации, не бил оштетен.
Стадионот „Валериј Лобановски“ се наоѓа во центарот на Киев, во близина на зградите на украинската влада и парламентот. Објектот е отворен во 1934 година и со децении е домашен терен на фудбалскиот клуб „Динамо Киев“. Името го носи по легендарниот тренер Валериј Лобановски.
Кличко соопшти и дека руски дрон паднал во Голосеевскиот округ, каде што се запалил автомобил. Пожарот бил брзо изгаснат од противпожарните екипи.
Украинските воздухопловни сили претходно предупредиле за движење на ударни дронови над Киев, вклучително и беспилотни летала на млазен погон.
Воздушната тревога била активирана пред пладне, по што итните служби биле испратени на повеќе локации.
Во претходниот бран напади врз Киев биле оштетени две образовни установи и градска болница во Шевченковскиот округ, додека остатоци од соборени летала паднале и во близина на станбени згради во Подилскиот округ.
