(Видео) Жесток руски напад врз Киев, погодена и Националната академија на науките

Русија денеска изврши силен воздушен напад врз Киев, при што меѓу погодените објекти е и зградата на Националната академија на науките на Украина. Според првичните информации што ги објави украинскиот претседател Володимир Зеленски, во нападите има загинати цивили, а спасувачките екипи се на терен.

— реклама —

На снимките објавени на социјалните мрежи се гледа тешко оштетената и запалена зграда на Академијата. Урнати се делови од покривот и горните катови, а од објектот се издигаат густ чад и пламен. Просторот околу зградата е затрупан со градежен материјал, додека оштетени се и автомобили паркирани во близина.

— реклама —

Пожарникарите се обидуваат да го локализираат пожарот, додека спасувачките екипи проверуваат дали во објектот има луѓе заробени под урнатините.

Зеленски соопшти дека зградата на Академијата не била единствената цел на нападите врз Киев и други делови од Украина. Според него, во главниот град биле погодени и фармацевтска компанија и бензински станици, додека во Днипро бил погоден деловен објект. Во други градови и региони биле оштетени цивилни објекти, компании и комуникациска инфраструктура.

— реклама —

Украинскиот претседател изјави дека во нападите има загинати и упати сочувство до семејствата на жртвите. Тој исто така порача дека Русија ќе се соочи со последици за нападите и ги повика меѓународните партнери да продолжат со поддршката за Украина.