Вирусот Западен Нил се шири во Европа: Во Италија над 650 заразени

Потоплото време и сè подолгите топли сезони создаваат услови комарците што го пренесуваат вирусот Западен Нил да се шират на поголеми подрачја и да бидат активни подолг период во годината, предупредуваат италијанските здравствени власти.

Во Италија годинава се регистрирани повеќе од 650 случаи на инфекција, што претставува околу половина од сите случаи пријавени во Европа, според податоците на италијанските здравствени власти.

— реклама —

Истражувачот од Италијанскиот национален институт за здравство Антонино Бела вели дека повисоките температури поврзани со климатските промени им овозможуваат на комарците полесно да се размножуваат и ја продолжуваат сезоната на пренос на вирусот.

Вирусот Западен Нил во Италија се смета за ендемски од 2020 година, кога започнал значително да се зголемува бројот на случаи. Оттогаш инфекциите се регистрираат речиси секое лето и во раната есен.

Околу 80 отсто од заразените лица немаат симптоми, додека кај најголем дел од останатите инфекцијата предизвикува благи симптоми слични на грип. Во мал број случаи може да дојде до сериозни невролошки компликации, особено кај постарите лица и луѓето со други здравствени проблеми.

— реклама —

Иако бројот на случаи во Италија годинава е приближно на нивото од претходните сезони, експертите предупредуваат дека потоплите температури можат да ја продолжат сезоната на пренос дури до ноември.

„Потоплата клима значи подолга сезона на комарци, што им овозможува на векторите да преживеат подолго. Топлите температури исто така значат дека самиот вирус подобро ќе преживува“, изјави Марк-Ален Видодсон од Европската канцеларија на Светската здравствена организација. Тој истакна дека климатските промени не се единствениот фактор, но дека затоплувањето има значајно влијание.

— реклама —

На вирусот му се посветува сè поголемо внимание и во северните делови на Европа. Холандија годинава пријавила повеќе од 20 случаи, што се првите регистрирани случаи од 2020 година, како и неколку смртни случаи.

Европскиот центар за превенција и контрола на болести (ECDC) во јуни предупреди дека затоплувањето, почестите и поинтензивни топлотни бранови и поплави, како и подолгите и потопли лета, создаваат поповолни услови за ширење на инвазивни видови комарци.

Меѓу нив се Aedes albopictus и Aedes aegypti, кои можат да пренесуваат повеќе вируси, меѓу кои Западен Нил, денга, жолта треска и зика.

Според ECDC, пред една деценија комарецот Aedes albopictus бил присутен во осум европски земји и 114 региони. Годинава е регистриран во 13 земји и 337 региони, што укажува на значително проширување на неговото присуство.

Експертите, сепак, посочуваат дека бројот на откриени случаи во Италија делумно се должи и на нејзиниот развиен систем за следење, кој ги мониторира комарците, птиците, крводарителите и инфекциите кај луѓето.