Покачените маснотии во крвта претставуваат сериозен ризик за здравјето, но правилната исхрана може значително да помогне во нивната контрола. Експертите посочуваат дека промените можат да започнат уште со првиот оброк во денот, а добро избраниот појадок може да придонесе за намалување на нивото на лошиот холестерол.
Иако холестеролот е неопходен за нормално функционирање на организмот и учествува во создавањето хормони, жолчни киселини и клеточни мембрани, проблем настанува кога нивото на LDL или таканаречениот „лош“ холестерол е покачено.
Меѓу најпрепорачаните намирници за појадок се овесните снегулки, кои содржат бета-глукан – растворливи влакна што можат да помогнат во намалувањето на LDL холестеролот. Нутриционистите советуваат тие да се комбинираат со бобесто овошје, како малини, капини и боровинки, како и со јаткасти плодови и семиња.
Корисен избор се и јаболката, кои содржат пектин – вид растителни влакна што помагаат во врзувањето и елиминацијата на дел од холестеролот од организмот, а истовремено придонесуваат и за подобро здравје на дигестивниот систем.
За оние што сакаат покалоричен појадок, особено за време на викендите, добар избор може да биде и лососот. Оваа риба е богата со омега-3 масни киселини, кои позитивно влијаат врз здравјето на срцето и крвните садови.
Од друга страна, се препорачува ограничување на намирниците богати со заситени масти, како бел леб и пецива, сланина, сувомеснати производи, путер, павлака, колачи и полномасни сирења.
Кога станува збор за јајцата, експертите посочуваат дека тие не мора целосно да се исфрлат од исхраната. Според нив, клучна е умереноста и вкупниот начин на исхрана. Кај повеќето луѓе, повремената консумација на јајца нема значително влијание врз нивото на холестерол доколку исхраната е балансирана и богата со овошје, зеленчук, интегрални житарки и здрави масти.
