Владата на денешната седница донесе одлука со која кризна состојба поради можност од нарушување на снабдувањето со нафта и нафтени деривати се продолжува до 20 октомври.
Со измената на претходната одлука, рокот на важење на кризната состојба, кој истекуваше на 20 јули, се продолжува за периодот од 21 јули до 20 октомври. Од Владата велат дека со ова се обезбедува континуитет во институционалното постапување и можност за навремено преземање мерки доколку дојде до нарушувања во снабдувањето или до значителни ценовни шокови на меѓународните пазари.
Како што посочуваат, целта е Владата да располага со соодветен правен механизам за брза и ефикасна реакција, со што би се зачувала стабилноста во снабдувањето, би се ублажиле последиците од евентуални пазарни нарушувања и би се заштитиле интересите на граѓаните и стопанството.
Од Владата најавуваат дека и понатаму внимателно ќе ги следат состојбите на домашниот и меѓународниот енергетски пазар и, доколку биде потребно, ќе носат навремени мерки за обезбедување сигурно и непречено снабдување со нафта и нафтени деривати.
По завршување на владините процедури, одлуката ќе биде доставена до Собранието на разгледување и усвојување, согласно законските надлежности.
