Во партиско соопштение, ВМРО-ДПМНЕ информира дека од август ќе започне програмата „Месеци на практикантство“, преку која студентите ќе имаат можност практично да се вклучат во работата на општините.
Според партијата, програмата ќе се реализира во текот на август и септември во соработка со државните универзитети, а ќе биде дел од стратешката соработка меѓу Министерството за локална самоуправа и Агенцијата за иновации, научно-технолошки развој и претприемништво – ИНОВА.
Од ВМРО-ДПМНЕ наведуваат дека Агенцијата ќе го координира вклучувањето на студентите, додека Министерството за локална самоуправа ќе ја организира практичната работа во согласност со потребите на општинските администрации.
Во соопштението се посочува и дека преку грант-програмите на ИНОВА ќе се поддржат стартапи, иновативни компании и претприемачи кои ќе понудат решенија за предизвиците со кои се соочуваат општините.
Од партијата оценуваат дека со оваа програма се создаваат нови можности за младите, се зајакнува локалната самоуправа и се поттикнува поврзувањето на институциите, универзитетите и бизнис-заедницата.
