ВМРО-ДПМНЕ преку соопштение соопшти дека Владата продолжува со спроведување на политики насочени кон намалување на невработеноста, отворање нови работни места и подобрување на економските перспективи за граѓаните.
Според партијата, официјалните податоци на Државниот завод за статистика покажуваат намалување на стапката на невработеност од 12,5 на 11,3 проценти, додека стапката на вработеност е зголемена од 45,6 на 46,5 проценти.
Во првиот квартал од 2026 година во државата биле евидентирани 707.385 вработени лица, што е повеќе во споредба со второто тримесечје од 2024 година, кога бројот на вработени изнесувал 691.736, стои во соопштението.
Од ВМРО-ДПМНЕ велат дека позитивните показатели се резултат на мерките за поддршка на домашните компании, привлекување инвестиции и креирање нови работни места.
Во таа насока, Владата го спроведува Оперативниот план за вработување за 2026 година, вреден речиси 40 милиони евра, со кој се предвидува поддршка за повеќе од 10.000 лица. Од нив, над 32 милиони евра се наменети за директно отворање нови работни места и активни мерки за вработување.
Посебен акцент е ставен на мерката за самовработување и претприемништво, преку која се очекува отворање на повеќе од 2.000 нови работни места. Од партијата потсетуваат дека преку минатогодишниот оперативен план биле основани повеќе од 2.200 нови правни субјекти.
Младите остануваат меѓу главните приоритети на Владата, при што со новиот план се предвидува вклучување на околу 6.000 лица до 29-годишна возраст во различни програми за вработување, обуки и професионален развој, стои во соопштението.
Дополнително, 3.500 млади до 23 години вработени во производствени капацитети ќе добиваат младински додаток од 3.000 денари месечно, како поттик за нивно задржување на домашниот пазар на труд.
Од ВМРО-ДПМНЕ во соопштението порачуваат дека остануваат посветени на политики кои ќе придонесат за отворање нови работни места, развој на претприемништвото и зајакнување на македонската економија.
