Во рок од една недела Владата се очекува да го претстави решението со кое правосудниот испит ќе може да се полага и на албански јазик.
Ова го најави заменик-премиерот Беким Сали, кој рече дека консултациите се во завршна фаза и дека не станува збор само за правосудниот испит, туку и за поширок пакет поврзан со слични прашања.
„Сме во завршна фаза на консултации со експерти и верувам дека многу скоро, можеби… сега не сакам да се фаќате за временската рамка, можеби и една недела може да трае до конечната одлука која ќе ја промовираме на ист начин, верувам“, рече Сали.
Тој додаде дека Владата не работи само на решение за правосудниот испит.
„Нема да се работи само за правосудниот испит, туку и за други слични теми“, кажа Сали.
Најавата доаѓа по протестот во Скопје, на кој се бараше правосудниот испит да може да се полага и на албански јазик. На протестот беа истакнати транспаренти со пораки како „Знаењето нема забранет јазик“ и „Политиката го зароби Уставниот суд“, а дел од демонстрантите извикуваа и „УЧК“.
Премиерот Христијан Мицкоски претходно изјави дека Владата работи на „трајно решение“ за ова прашање, но оцени дека на протестот биле прекршувани законите за знамињата и државната химна.
