ВМРО-ДПМНЕ преку соопштение ги отфрли обвинувањата на СДС за состојбите во земјоделството, оценувајќи дека токму поранешната власт оставила зад себе неисплатени субвенции, долгови и незадоволни земјоделци, додека актуелната власт, според нив, редовно ги сервисира обврските и бележи раст на производството.
Од партијата посочуваат дека СДС до пред две години ја предводела Владата и дека последиците од нивното владеење се чувствувале и во земјоделскиот сектор.
„Земјоделците се едни од оние кои најсурово на свој грб ја осетија раката од владеењето на СДС, со неисплатени плати и субвенции, ниски откупни цени, несигурен пласман и земјоделски производи кои завршуваа на буниште“, се наведува во реакцијата.
ВМРО-ДПМНЕ тврди дека од претходната власт наследиле неисплатени субвенции за периодот од 2020 до 2023 година, како и неисплатени обврски кон сточарите и млекопроизводителите.
Според партијата, по преземањето на власта биле исплатени 350 милиони денари за заостанати плати во ЈП „Национални шуми“ и АД „Водостопанство“, а од јули 2024 година до денес биле исплатени близу 14 милијарди денари за заостанати и тековни обврски во земјоделството.
Во соопштението се наведува и дека поради неискористени средства од кредит од германската развојна банка KFW, државата претходно исплатила над два милиони евра провизии.
Од ВМРО-ДПМНЕ посочуваат дека статистичките податоци покажуваат подобрување на состојбите во секторот, наведувајќи дека во 2025 година е регистриран раст од 2,7 проценти во производството на кравјо млеко во однос на претходната година, како и зголемување од четири проценти кај производството на овчо млеко.
Партијата наведува дека раст е забележан и кај производството на јајца, свинско месо и пченица, при што лани, според нив, биле откупени над 300.000 тони пченица.
„Додека со ВМРО-ДПМНЕ на власт, македонските земјоделци имаат партнер со кој заеднички ги решаваат сите проблеми и предизвици и заеднички градат стратегии за развој на земјоделството“, се наведува во реакцијата.
