Пратеничката на СДСМ, Бисера Костадиновска-Стојчевска, денеска на прес-конференција обвини дека власта не покажува вистинска грижа за македонскиот јазик и побара претседателот на Собранието, Африм Гаши, да овозможи одржување надзорна расправа за примената на Законот за употреба на македонскиот јазик.
Таа истакна дека и покрај тоа што Законот беше донесен во јануари 2024 година, неговите одредби сè уште не се спроведуваат, а институциите не преземаат конкретни чекори за негова имплементација.
„Никој не се грижи за македонскиот јазик. Иако постојано предупредувавме дека законот не се применува, како никому да не му е грижа во ВМРО-ДПМНЕ“, рече Костадиновска-Стојчевска.
Таа потсети дека на 23 март годинава пратеничката група на СДСМ и коалицијата поднела барање за одржување надзорна расправа за нефункционирањето на законот, посочувајќи дека нема национална стратегија и национален став за негување и развој на македонскиот јазик.
Според неа, и покрај најавите за вработување лектори, не е реализирана ниту една одредба предвидена со законот, поради што јавноста има право да поставува прашања за односот на ресорното Министерство кон ова прашање.
„Ова не е политичка битка, туку битка за зачувување и унапредување на македонскиот јазик“, порача Костадиновска-Стојчевска, додавајќи дека македонскиот јазик мора да биде меѓу највисоките приоритети во културните политики на државата.
