ВМРО-ДПМНЕ преку соопштение упати серија обвинувања кон поранешниот директор на Царинската управа, Стефан Богоев, и кон раководството на СДСМ, тврдејќи дека во периодот кога бил на функцијата бил наместен тендер за одржување на хигиена на граничните премини и царинските терминали, во вредност од 18 милиони денари.
Од владејачката партија тврдат дека тендерот бил договорен со лице кое го поврзуваат со СДСМ и дека за тоа наводно било исплатено мито. Според нивните тврдења, станува збор за корупциска афера која, како што наведуваат, не треба да се третира како изолиран случај.
Во партиското соопштение се поставува прашањето до претседателот на СДСМ, Венко Филипче, дали ги смета овие наводи за криминал и зошто, според ВМРО-ДПМНЕ, нема реакција од опозициската партија.
Од ВМРО-ДПМНЕ, исто така, го повикаа Јавното обвинителство да провери дали се точни информациите дека била договорена провизија во висина од 10 проценти од вредноста на тендерот, што би изнесувало околу 1,8 милиони денари.
Партијата наведува дека случајот треба темелно да се истражи и да се утврди дали имало злоупотреба на службената положба и незаконско влијание врз постапката за јавна набавка.
