Од ВМРО-ДПМНЕ преку соопштение обвинија дека СДСМ, Левица и ДУИ создаваат конфузија околу измените на Изборниот законик, оценувајќи дека опозициските партии немаат усогласен став за предложените решенија.
Од партијата велат дека опозицијата најпрво постигнала договор за измените, а потоа го блокирала законот, додека во јавноста, како што тврдат, изнесува различни ставови од оние за кои се разговарало зад затворени врати.
ВМРО-ДПМНЕ смета дека измените треба да овозможат проширување на демократските права, особено за македонските иселеници, на кои, според нив, треба да им се овозможи гласање по пошта или по електронски пат.
„Како владејачко мнозинство ќе прифатиме сè што ќе побараат, само да се прошири и унапреди правото на глас и дијаспората да гласа по пошта или електронски“, наведуваат од партијата.
Од ВМРО-ДПМНЕ ги повикаа СДСМ, Левица и ДУИ најпрво да изградат заеднички став за прашањата поврзани со Изборниот законик, вклучително и за моделот на изборни единици, финансирањето и начинот на гласање на дијаспората.
Партијата порача дека останува отворена за разговори и дијалог за сите прашања поврзани со унапредувањето на политичкиот систем, реформите и европската интеграција, оценувајќи дека демократското право на глас на иселениците и Изборниот законик не смеат да бидат жртви на дневнополитички калкулации.
