ВМРО-ДПМНЕ до Филипче: Ако има дилеми за атентатот врз Глигоров, нека го праша Фрчкоски

ВМРО-ДПМНЕ му порача на лидерот на СДСМ, Венко Филипче, доколку има дилеми околу атентатот врз првиот претседател Киро Глигоров, да го праша Љубомир Фрчкоски, кој во времето на атентатот беше министер за внатрешни работи.

Реакцијата на ВМРО-ДПМНЕ следува по соопштението на СДСМ по повод 31 година од атентатот врз Глигоров, во кое опозициската партија направи политичка паралела меѓу атентатот од 3 октомври 1995 година и настаните во Собранието од 27 април 2017 година.

— реклама —

„СДС, исто како и Венко Филипче, губат контакт со реалноста и се претвораат во несериозна партија. Не знаевме, но тоа го дознавме од соопштението на СДС – дека за атентатот врз Киро Глигоров е виновно ВМРО-ДПМНЕ“, велат од ВМРО-ДПМНЕ.

Од партијата бараат СДСМ да каже врз кои докази ги темели своите тврдења и прашуваат зошто случајот не бил разрешен во периодот кога СДСМ бил на власт по атентатот.

— реклама —

„Впрочем, како што е паушално и лажно ова соопштение, паушална и лажна е и целата политика на Венко Филипче. Нека кажат на кои докази го темелат тоа? Ако било така како што тврдат од СДС, тогаш зошто нема разрешница, со оглед на тоа што уште цели три години по атентатот на власт е СДС?“, прашуваат од ВМРО-ДПМНЕ.

Во реакцијата од партијата го посочуваат и Љубомир Фрчкоски, кој на 3 октомври 1995 година, кога беше извршен атентатот врз Глигоров, беше министер за внатрешни работи.

„За време на атентатот министер за внатрешни работи е Љубомир Фрчкоски, кој сега сè уште е главен советник на Зоран Заев, сместен во штабот на СДС, каде снима поткасти со опрема платена од Зоран Заев“, наведуваат од ВМРО-ДПМНЕ.

— реклама —

Партијата во соопштението изнесува и низа обвинувања на сметка на Фрчкоски и неговиот син Јон Фрчкоски.

„Ако Венко Филипче има какви било дилеми за атентатот, нека го праша Љубомир Фрчкоски, кој вдомен во штабот на СДС снима поткасти и се лаже дека е некоја величина“, порачуваат од ВМРО-ДПМНЕ.

— реклама —

Атентатот врз Киро Глигоров беше извршен на 3 октомври 1995 година во центарот на Скопје со автомобил-бомба. Глигоров го преживеа нападот со тешки повреди, а случајот до денес не е разрешен.

Во времето на атентатот Фрчкоски беше министер за внатрешни работи. По нападот тој јавно говореше за можните организатори и понуди оставка од функцијата, која тогашниот премиер Бранко Црвенковски не ја прифати. Нарачателите и извршителите на атентатот врз Глигоров до денес не се официјално утврдени.