ВМРО-ДПМНЕ реагира на поканата од бугарскиот политичар Красимир Каракачанов до лидерот на партијата Христијан Мицкоски за присуство на пренесувањето на моштите на цар Самоил во Бугарија.
Од партијата велат дека поканата би било посоодветно Каракачанов да ја испрати до поранешниот премиер Зоран Заев и актуелниот лидер на СДСМ, Венко Филипче, кои ги оценуваат како негови истомисленици.
„Во однос на поканата на Каракачанов до лидерот на ВМРО-ДПМНЕ, Мицкоски, за присуство на пренесувањето на моштите, би посочиле дека посоодветно е поканата да ја испрати до неговите истомисленици, Зоран Заев и Венко Филипче“, се наведува во реакцијата.
Од ВМРО-ДПМНЕ ги посочуваат ставовите што, според нив, Заев ги изнесувал во односите со Бугарија, како и актуелните позиции на Филипче, оценувајќи ги како блиски до бугарската политика.
Во партиската реакција се наведува и дека Преспанскиот договор и Договорот за добрососедство со Бугарија ги сметаат за дел од, како што велат, „срамна и предавничка политика“.
Во однос на пренесувањето на моштите на цар Самоил во Бугарија, од ВМРО-ДПМНЕ прават споредба со историскиот пример на англискиот крал Ричард I, чии мошти се наоѓаат во Франција, наведувајќи дека тоа не значи дека тој бил Французин.
Од партијата потсетуваат и на пренесувањето на моштите на Гоце Делчев во Македонија, повикувајќи ги бугарските политичари да објаснат како го определуваат неговото историско значење.
„За нас, за разлика од Заев, Филипче или Каракачанов, вистината е едноставна, а тоа е дека тој е еден од најсветлите ликови во македонската историја“, стои во реакцијата.
Од ВМРО-ДПМНЕ додаваат дека го поздравуваат интересот во Бугарија за делото на цар Самоил, за кого велат дека има „неизбришлива трага за Македонија“.
