ВМРО-ДПМНЕ преку соопштение вели дека Владата продолжува со реализација на капиталните инфраструктурни проекти, оценувајќи дека државата забрзано се развива и инвестира во патната мрежа.
Од партијата информираат дека од следниот месец треба да започнат градежните работи на долгонајавуваната автопатска делница Скопје-Блаце, која ќе ја поврзе Македонија со Косово и ќе овозможи подобар пристап до пристаништата во Албанија и Црна Гора.
Во соопштението се наведува дека, за разлика од претходниот период кога, според ВМРО-ДПМНЕ, се давале само ветувања, актуелната Влада ги обезбедила финансиските средства, потпишала договори, избрала изведувач и консултант, додека постапката за избор на надзор е во завршна фаза.
Партијата додава дека интензивно продолжуваат и работите на автопатот Охрид-Кичево, каде што, како што наведуваат, веќе се вози на 37 километри од трасата, а целосното пуштање во употреба се очекува на почетокот на 2027 година.
Според ВМРО-ДПМНЕ, во изминатите две години биле решени повеќе наследени проблеми на оваа делница, меѓу кои потпишување анекс на договорот, измена на техничките стандарди за асфалтирање и решавање на проблемите со косините преку изградба на галерии.
Во соопштението се посочува дека со засилена динамика се работи и на автопатските делници од Коридорите 8 и 10Д, каде што, според партијата, се надминуваат долгогодишни проблеми, меѓу кои и експропријацијата на земјиштето.
Од ВМРО-ДПМНЕ оценуваат дека инвестициите во патната инфраструктура придонесуваат за, како што велат, најголем градежен бум во поновата историја на државата.
