Од ВМРО-ДПМНЕ денеска преку соопштение обвинија дека СДС, ДУИ и Арбен Таравари ги штитат своите функционери во врска со случајот со водата за пиење во Гостивар, наместо, како што велат, да побараат утврдување одговорност.
Според партијата, наместо брза реакција и барање одговорност од локалните институции, опозициските партии и Таравари избрале да го оправдуваат однесувањето на градоначалникот на Гостивар, Валбон Лимани.
Во соопштението ВМРО-ДПМНЕ наведува дека СДС, ДУИ и Таравари применуваат двојни критериуми кога станува збор за одговорноста на нивните функционери, оценувајќи дека таквиот пристап ја нарушува довербата на граѓаните во институциите.
Од партијата тврдат дека, додека локалната власт доцнела со реакцијата, Владата предводена од ВМРО-ДПМНЕ презела конкретни активности за справување со состојбата и заштита на јавниот интерес.
ВМРО-ДПМНЕ истакнува дека граѓаните имаат право да очекуваат целосно расчистување на случајот, утврдување на евентуална одговорност и преземање мерки за да не се повторат вакви ситуации.
Воедно, партијата ги повикува СДС, ДУИ и Таравари, како што наведува, да престанат да ги штитат своите функционери и интересот на граѓаните да го стават пред партиските интереси.
