Преку соопштение ВМРО-ДПМНЕ соопшти дека податоците за исплатените субвенции во земјоделството ги демантираат, како што наведуваат, тврдењата на СДС, оценувајќи дека токму претходната власт оставила долгови и незадоволни земјоделци.
Од партијата велат дека Владата предводена од ВМРО-ДПМНЕ ги исплатила заостанатите субвенции наследени од претходниот период, а во моментов се исплаќаат и тековните субвенции за 2025 година.
Според нив, во периодот од 2021 до 2023 година, владата на СДС и ДУИ исплатила помалку од 14 милијарди денари субвенции, додека актуелната власт, со исплатата на дополнителни две милијарди денари за тутунарите, ќе достигне вкупно околу 15 милијарди денари за само две години.
„Тоа е една милијарда денари повеќе за две години отколку што СДС и ДУИ исплатиле за три години“, наведуваат од ВМРО-ДПМНЕ.
Во соопштението се посочува и дека за време на претходната власт, 17 месеци не биле исплатени субвенции за предадено млеко, оценувајќи дека е парадоксално СДС да го критикува секторот за млекопроизводство.
Од партијата тврдат дека годинава се бележат позитивни резултати во земјоделството, наведувајќи раст од 2,7 проценти во производството на кравјо млеко и четири проценти кај овчото млеко во споредба со 2024 година.
Како позитивни показатели ги посочуваат и зголеменото производство на јајца, свинско месо, како и минатогодишниот откуп на над 300.000 тони пченица.
„Наместо празни ветувања и оправдувања, Владата предводена од ВМРО-ДПМНЕ ја враќа довербата кај земјоделците и заедно со нив создава стратегија за развој на македонското земјоделство“, се наведува во соопштението.
