ВМРО-ДПМНЕ преку соопштение реагираше на изјавите на лидерот на СДСМ, Венко Филипче, поврзани со случајот со загадената вода во Гостивар, обвинувајќи го дека се обидува да извлече политичка корист од состојбата и побара јавно да се изјасни дали го поддржува ставот на градоначалникот на Гостивар, Валбон Лимани, кој, според партијата, не чувствува морална одговорност за случајот.
Од ВМРО-ДПМНЕ тврдат дека Филипче, заедно со, како што наведуваат, компромитирани кадри околу себе, нема кредибилитет да бара одговорност и дека со своите настапи шири шпекулации наместо да придонесе за смирување на јавноста.
Партијата потсетува дека Филипче јавно го поддржувал Валбон Лимани и прашува дали и натаму стои зад неговиот став дека не сноси морална одговорност за постапките на лицата што ги назначил да раководат со општинските претпријатија.
Во соопштението ВМРО-ДПМНЕ упатува критики и кон СДСМ, тврдејќи дека партијата нема морален кредибилитет да зборува за одговорност поради, како што наведуваат, луѓе со криминално минато кои се дел од нејзиното раководство.
Од владејачката партија го критикуваат и мандатот на Филипче како министер за здравство, оценувајќи дека тој нема основа да држи лекции за функционирањето на здравствениот систем.
Според ВМРО-ДПМНЕ, додека надлежните институции спроведуваат контроли и ја утврдуваат фактичката состојба, Филипче однапред носи заклучоци и со своите изјави создава непотребна загриженост кај граѓаните.
Од партијата порачуваат дека институциите треба непречено да ја завршат својата работа, а сите резултати и наоди да бидат објавени транспарентно, врз основа на факти и стручни анализи, а не на политички квалификации. Воедно, нагласуваат дека здравјето на граѓаните не смее да се користи за политички маркетинг.
