ВМРО-ДПМНЕ преку соопштение реагираа на денешната прес-конференција на претседателот на СДСМ, Венко Филипче, оценувајќи дека тој нема кредибилитет да зборува за состојбите во здравството и обвинувајќи го дека зад себе оставил сериозни проблеми во системот.
Во партиското соопштение се наведува дека за време на мандатот на Филипче како министер за здравство се наталожиле проблеми како недостиг на здравствен кадар, долги листи на чекање и нарушена доверба во институциите.
Од ВМРО-ДПМНЕ тврдат дека во тој период голем број здравствени работници го напуштиле јавното здравство, а пациентите се соочувале со недостиг на лекови и лоши услови за лекување. Воедно, ја споменуваат и аферата со Клиниката за онкологија, за која велат дека е еден од најголемите скандали во здравствениот сектор.
Во реакцијата се осврнуваат и на состојбата во Гостивар, наведувајќи дека Владата презела мерки за справување со проблемот со водоснабдувањето. Според партијата, секојдневно се обезбедуваат повеќе од 60 тони вода за пиење и техничка употреба, надлежните институции веднаш издале препораки, а осомничените во случајот биле приведени и против нив се води постапка.
Од ВМРО-ДПМНЕ додаваат дека Владата е насочена кон стабилизација на здравствениот систем, подобрување на условите во јавните здравствени установи, намалување на листите на чекање, инвестиции во медицинска опрема и обезбедување поквалитетни здравствени услуги за граѓаните.
