ВМРО-ДПМНЕ: Филипче решил модуларните болници да бидат поставени и покрај сите институционални пречки и неисполнети услови, Абази не го смета за виновен оти и самиот е инсталација на СДС

ВМРО-ДПМНЕ преку соопштение обвинува дека модуларните болници во земјава за време на ковид-кризата биле поставувани и покрај институционалните предупредувања и без да бидат исполнети сите законски и технички услови.

— реклама —

Од партијата особено го посочуваат случајот со модуларната болница во Тетово, каде што во пожарот во 2021 година загинаа 14 лица. Според ВМРО-ДПМНЕ, тогашниот економски директор на тетовската болница, Артан Етеми, до последен момент одбивал да ја прими и стави во употреба модуларната болница. Тој подоцна беше осуден на една и пол година затвор.

Од ВМРО-ДПМНЕ наведуваат дека Катастарот одбивал да ги запише модуларните болници бидејќи биле набавени како стоки, а немало извештај од надзор согласно член 74 од Законот за градење.

— реклама —

Партијата тврди и дека Светска банка барала одобренија за поставување и употреба на модуларните болници, како и извод од Катастарот како доказ дека проектот е одржлив. Според нив, таквите одобренија не можеле да бидат издадени ниту од општините, ниту од Министерството за транспорт и врски, бидејќи не била спроведена потребната процедура согласно Законот за градење.

— реклама —

„Сите институционални и стручни предупредувања биле тука. Сите се противеле, но Филипче сепак одлучил модуларните болници да бидат поставени“, велат од ВМРО-ДПМНЕ.

Од партијата додаваат дека за случајот бил оформен предмет кој со години стоел во фиока, а кога дошло време за утврдување одговорност, постапката завршила без кривична одговорност за Венко Филипче.

— реклама —

ВМРО-ДПМНЕ во соопштението го обвинува и обвинителот Ислам Абази, тврдејќи дека случајот претставува пример за, како што велат, „инсталациите на СДС и ДУИ во судството и обвинителството“.