ВМРО-ДПМНЕ преку соопштение ги отфрли обвинувањата изнесени на прес-конференцијата на членот на Извршниот одбор на СДСМ, Јон Фрчкоски, тврдејќи дека компаниите што ги посочил редовно добивале тендери и во периодот кога СДС беше на власт.
Од владејачката партија наведуваат дека фирмите споменати од Фрчкоски со години учествуваат на јавни набавки и добиваат договори согласно најповолните понуди, а податоците за тоа, како што велат, се јавно достапни преку електронскиот систем за јавни набавки.
„Тоа што Јон Фрчкоски сака да го претстави како откритие е јавно достапна информација и секој заинтересиран може да ја провери“, се наведува во реакцијата.
Според ВМРО-ДПМНЕ, компанијата „МБМ Архитекти“ во периодот на владеење на СДС добивала тендери од повеќе институции, меѓу кои Министерството за образование, Министерството за здравство, Министерството за труд и социјална политика, Собранието, АД МЕПСО, Државна видеолотарија, Општина Центар, како и универзитетски клиники и факултети.
Од партијата тврдат дека и „МГ Проект“ добивала договори од институции и општини раководени од кадри на СДС, посочувајќи ги општините Центар, Струмица, Делчево, Валандово, Богданци, Крива Паланка и Крушево, како и неколку министерства.
Во реакцијата, ВМРО-ДПМНЕ оценува дека во случајот нема никаков скандал, туку станува збор за компании кои подолг период работат на пазарот и редовно учествуваат во постапките за јавни набавки.
Партијата упати и политички критики кон раководството на СДСМ и неговиот претседател Венко Филипче.
