ВМРО-ДПМНЕ повторно го нападна лидерот на СДСМ, Венко Филипче, поради неговите критики за плановите за развој на дата-центри во Македонија, обвинувајќи го дека шири паника и дека можеби се води од лични и бизнис-интереси.
Членот на ИК и пратеник Миле Лефков рече дека СДСМ намерно создава „паника и хистерија“ и дека во јавните настапи покажува непознавање на основните прашања поврзани со дата-центрите.
„Филипче и СДС треба да знаат дека едно се инвестиции од поединци како онаа во Пехчево, а друго е кога државата преговара за отворање вакви дата-центри“, рече Лефков.
Тој се повика и на претходните изјави на премиерот Христијан Мицкоски, според кои, доколку државата преземе институционален чекор за изградба на ваков објект, јавноста ќе биде информирана за целиот процес.
Лефков повтори дека, според информациите што досега ги соопшти Владата, се водат разговори со пет или шест потенцијални инвеститори.
„Кога државата ќе преземе институционален чекор за изградба на таков објект, јавно ќе биде сè презентирано“, рече тој.
Според Лефков, при евентуалната реализација на вакви инвестиции нема да се дозволи загрозување на животната средина или животниот стандард на граѓаните.
Потоа тој упати серија политички обвинувања кон Филипче, прашувајќи дали неговата загриженост за дата-центрите е мотивирана од лични интереси и правејќи паралела со бизниси поврзани со марихуана во времето на претходната власт.
Лефков ги поврза Филипче и поранешниот премиер Зоран Заев со наводни деловни интереси, но во изјавата не понуди докази со кои би се потврдиле овие обвинувања.
„Дали грижата се појави во момент кога Филипче виде дека нема да може валкано, со низа манипулации, да се занимаваат со ова луѓе блиски до него и до другар му Зоран Заев, како што тоа го правеа кога стануваше збор за марихуаната“, рече Лефков.
Тој продолжи и со лични квалификации кон лидерот на СДСМ, обвинувајќи го дека реагира само кога, како што рече, „неговиот и бизнисот на Заев не поминуваат“.
