ВМРО-ДПМНЕ соопшти дека Македонија има најниска инфлација во регионот меѓу земјите што досега ги објавиле податоците за јуни, обвинувајќи ја СДСМ дека шири невистини и се обидува да создаде чувство на економска несигурност.
Од владејачката партија наведуваат дека, според последните податоци на Државниот завод за статистика, годишната инфлација во јуни изнесува 3,4 проценти, што, како што велат, претставува намалување од 0,5 проценти во однос на мај.
„Бројките и податоците јасно покажуваат дека Македонија има најниска инфлација во регионот. Тоа се официјални факти“, наведуваат од ВМРО-ДПМНЕ.
Според партијата, инфлацијата кај храната и безалкохолните пијалаци изнесува 2,5 проценти, а кај облеката и обувките 2,1 процент, категории кои, како што посочуваат, најдиректно влијаат врз животниот стандард на граѓаните.
Во соопштението се наведува и споредба со останатите земји од регионот:
Македонија – 3,4%
Словенија – 3,6%
Грција – 3,9%
Хрватска – 4,5%
Бугарија – 5,6%
Турција – 32,1%
„Ова се бројки што не можат да се сокријат ниту да се релативизираат“, велат од ВМРО-ДПМНЕ.
Од партијата оценуваат дека додека СДСМ се обидува да гради дневна политика врз, како што велат, „измислени кризи и ширење паника“, Владата спроведува конкретни економски мерки кои даваат резултати.
„Намалената инфлација е директен доказ дека економските политики се правилно поставени и дека се води одговорна грижа за стандардот на граѓаните. Наместо манипулации и лажни сценарија од СДС, јавноста заслужува мерки и проекти“, стои во реакцијата.
Од ВМРО-ДПМНЕ додаваат дека Владата ќе продолжи со, како што наведуваат, одговорни економски политики, стабилни јавни финансии и мерки насочени кон зачувување на ценовната стабилност и подобрување на животниот стандард.
