ВМРО-ДПМНЕ: Ислам Абази го затвори предметот за модуларните болници и го спаси Венко Филипче, откако обинителките од поранешно СЈО со години го чуваа во фиока

ВМРО-ДПМНЕ преку соопштение реагира на одлуката на Основното јавно обвинителство за гонење на организиран криминал и корупција да го затвори предметот поврзан со набавката и изградбата на 19-те модуларни болници, оценувајќи дека со тоа е избегнато кривично гонење на поранешниот министер за здравство Венко Филипче.

Од партијата потсетуваат дека предметот бил оформен на 10 септември 2021 година, непосредно по трагичниот пожар во модуларната болница во Тетово, во кој животот го загубија 14 лица. Според ВМРО-ДПМНЕ, по пет години ОЈО ГОКК, предводено од Ислам Абази, донело одлука дека не постои основано сомнение за злоупотреба на службената положба и овластувања.

— реклама —

Од партијата тврдат дека Филипче имал директна одговорност за поставувањето на модуларните болници, посочувајќи ги измените на Законот за градење со кои овие објекти биле третирани како урбана опрема, за чие поставување и одобрение било надлежно Министерството за здравство.

— реклама —

ВМРО-ДПМНЕ обвинува и дека не биле изработени потребните технички спецификации и елаборат за електрична енергија, а дополнително го посочува и фактот дека модуларната болница во Тетово била поставена во близина на резервоар на бензинска станица.

Партијата особено го проблематизира времетраењето на постапката, тврдејќи дека предметот со години бил во обвинителските фиоки, најпрво кај Вилма Русковска, а потоа кај Елизабета Јосифовска.

— реклама —

„На само месец дена од заминувањето од челната позиција во обвинителството, Абази си ги одработува последните нарачки за заштита на своите шефови и спас на Венко Филипче од кривичен прогон“, обвинува ВМРО-ДПМНЕ.

— реклама —

Од партијата додаваат дека затворањето на предметот не значи дека случајот засекогаш е затворен и оти, доколку се појават нови докази, постапката може повторно да биде отворена.

ВМРО-ДПМНЕ најавува дека ќе продолжи да бара целосно расчистување на трагедијата во Тетово и утврдување одговорност за сите за кои ќе се утврди дека направиле пропусти или злоупотреби.