Од ВМРО-ДПМНЕ преку соопштение реагираа на критиките од опозициската СДСМ, оценувајќи дека, како што велат, политичките напади и обвинувања нема да го спречат развојот на државата.
Од партијата посочуваат дека актуелната Влада во изминатите две години обезбедила стабилност, економски раст и инвестиции, за разлика од претходниот период кој, според нив, бил обележан со кризи и финансиски проблеми.
„Македонската економија бележи раст седум квартали по ред, со стапка на раст на БДП од три проценти, што е показател дека државата се движи во вистинска насока“, наведуваат од ВМРО-ДПМНЕ.
Од партијата истакнуваат дека во изминатиот период се реализирани рекордни инвестиции во висина од 1,255 милијарди евра, како и дека се спроведува најголемиот инвестициски циклус во поновата историја на државата.
Според ВМРО-ДПМНЕ, зголемени се платите во повеќе сектори, меѓу кои образованието, здравството, полицијата и одбраната, а просечната нето-плата за две години пораснала за речиси 20 проценти.
Во соопштението се наведува и дека Владата работи на изградба на шест нови автопатски делници, додека во следниот период се предвидени значајни капитални инвестиции во патната и железничката инфраструктура.
Од ВМРО-ДПМНЕ посочуваат дека е намалена стапката на невработеност, а истовремено се реализираат мерки наменети за младите, меѓу кои ваучери за електронски уреди, поддршка за започнување сопствен бизнис и субвенции за млади земјоделци.
Партијата оценува дека резултатите од владините политики се видливи и дека Македонија продолжува да се развива и економски да напредува.
