ВМРО-ДПМНЕ преку соопштение реагираше на денешната прес-конференција на претседателот на СДСМ, Венко Филипче, обвинувајќи го дека инсистира на внесување на Бугарите во Уставот и дека, како што наведуваат, води политика спротивна на националните интереси.
Во соопштението од партијата велат дека Филипче го претставува внесувањето на Бугарите во Уставот како неопходен услов за европската интеграција на државата.
„Денес повторно Венко Филипче продолжува со своето инсистирање Бугарите да влезат во Уставот, прикажувајќи го како услов без кој не може. Conditio sine qua non за нашата интеграција во ЕУ“, стои во реакцијата.
Во соопштението се тврди дека политиката на СДСМ била водена од, како што наведуваат, „заложништво кон Бугарија“ и дека партијата прифаќала договори и предлози без гаранции.
Од ВМРО-ДПМНЕ обвинуваат дека Филипче ги игнорира ставовите од Бугарија поврзани со македонскиот идентитет и јазик.
„Човекот денес излезе и практично кажа дека никогаш не чул Бугарија да го негира македонскиот идентитет. Не чул дека Македонците ги нарекуваат вештачка нација. Не чул дека македонскиот јазик го нарекуваат бугарски дијалект“, наведуваат од партијата.
Во реакцијата дополнително се посочува дека СДСМ со години ја водела државата со политика на прифаќање отстапки заради останување на власт.
„Тоа не е европска политика. Тоа е политика на сервилност, страв и уцени“, стои во партиското соопштение.
Од ВМРО-ДПМНЕ оценуваат дека е, како што наведуваат, „трагично“ што лице „опкружено со сомнежи, афери и криминални сенки“ зборува за иднината на Македонија.
