Општина Бутел во изминатиот период реализирала низа инфраструктурни, образовни, спортски и комунални проекти, соопшти ВМРО-ДПМНЕ преку соопштение, од каде што велат дека промените се видливи низ повеќе населени места во општината.
Од партијата посочуваат дека започнале активности за изградба на водоводна мрежа во Љубанци и Љуботен, додека е завршено новото училиште во Визбегово, инвестиција вредна 106 милиони денари.
Како дел од реализираните проекти се наведуваат и надградбата на ООУ „Ацо Шопов“, започнатата изградба на затворен базен, две нови детски градинки, пет спортско-рекреативни центри и повеќе од 30 спортски и детски игралишта.
Во општината било уредено и речното корито на Серава во должина од 1.800 метри. Радишани добил нов парк и плоштад, додека во тек е изградбата на нов мега-парк на булеварот „Христијан Тодоровски Карпош“, пешачка патека покрај Серава и два нови моста.
ВМРО-ДПМНЕ наведува дека во изминатите пет години биле реализирани и повеќе реконструкции и асфалтирања на улици.
Од партијата најавуваат продолжување на инвестициите со изградба на нова поликлиника, секундарна водоводна мрежа во Љубанци и Љуботен, доградба на ООУ „Панајот Гиновски“ и нова детска градинка во Визбегово.
Во плановите се и нови спортски центри, дом на културата и активности за поставување видеонадзор на јавните површини.
„Една година е само почеток. Бутел се гради, се развива и се менува со конкретни проекти и уште посилно темпо во периодот што следува“, порачаа од ВМРО-ДПМНЕ.
