Колку и да се обидуваат да ја прикажат како „обнова“, сликата за Социјалдемократски сојуз на Македонија е јасна – тоа е партија која не пропаѓа поради грешки, туку поради сопствената заблуда дека јавноста нема меморија и дека истите луѓе од времето на Зоран Заев можат повторно да се продадат како решение, велат од ВМРО-ДПМНЕ.
Именувањето на Александар Наумоски и Драган Крајовски за членови на Извршниот одбор на СДС, според ВМРО-ДПМНЕ, не претставува кадровско освежување, туку јасно признание дека партијата нема намера да се откаже од политичкиот модел на Заев.
„Наумоски, како поранешен градоначалник на Општина Ѓорче Петров, во својот мандат остави општина со сериозен недостиг на вода, пренатрупани градинки и депонија која со години претставуваше еколошки проблем. Наместо решавање на овие прашања, уште на почетокот на мандатот си ја зголеми градоначалничката плата, а во последните шест месеци се обиде да протурка 25 урбанистички планови со брзина што, како што наведуваат од ВМРО-ДПМНЕ, никогаш не ја покажал кога станувало збор за јавниот интерес.
Дополнително, неговиот мандат бил проследен и со низа спорни тендери, меѓу кои и набавка на две машини за перење за градинка по цена од 25.500 евра, од фирма која редовно добивала општински тендери.
Од друга страна, Крајовски, како директор на затворот „Црн мост“ во Битола, според ВМРО-ДПМНЕ, го демонстрирал она што СДС најмногу го вреднува – молкот. Молчел кога избил пожар во ќелија и бил повреден затвореник, молчел кога европски средства за реновирање завршиле во објект кој почнал да се распаѓа по само две години, како и кога службени возила биле користени за приватни патувања во Албанија и Србија.
„И потоа, со сериозно лице и ароганција во телевизиски настапи, Венко Филипче сето ова го претставува како ‘реформски капацитет’, со што директно ја потценува јавноста“, реагираат од ВМРО-ДПМНЕ.
Според партијата, Филипче со ова испраќа јасна порака дека не бара излез од моделот на Заев, туку напротив – се обидува да го нормализира неговото влијание преку претставување на стари кадри како „нова енергија“.
„СДС одамна се откажа и од логика и од срам. Овие две старо-нови имиња се доказ дека во партијата суштински ништо не е сменето“, се наведува во реакцијата“, велат ид ВМРО-ДПМНЕ.
