Од ВМРО-ДПМНЕ преку соопштение реагираа на денешните обвинувања на СДСМ, наведувајќи дека надлежните институции веќе преземаат активности за проценка на штетите од невремето во Струмичко и ги повикаа граѓаните што претрпеле штети да ги пријават до Општина Струмица.
Во соопштението се наведува дека градоначалникот на Струмица, заедно со министерот за земјоделство, шумарство и водостопанство Борче Серафимовски, го посетиле струмичкото село Дабиле, каде што од земјоделците добиле информации за последиците од невремето проследено со силен дожд и ветер.
Од ВМРО-ДПМНЕ информираат дека, покрај увидот во оштетените земјоделски површини, била извршена и проверка на патната инфраструктура која, како што наведуваат, исто така била погодена од невремето.
Според партијата, благодарение на брзата реакција на надлежните служби, штетите на патиштата и јавната инфраструктура биле навремено санирани.
Од ВМРО-ДПМНЕ ги повикаа сите граѓани кои претрпеле штети да ги пријават во надлежните служби на Општина Струмица, со цел општинските комисии да излезат на терен, да извршат проценка и, во соработка со Владата, да се обезбеди соодветна поддршка.
Во реакцијата, партијата упати критика и до СДСМ, повикувајќи ја, како што наведуваат, „да не ликува на временските непогоди“.
