ВМРО-ДПМНЕ преку соопштение соопшти дека започнува процесот за приклучување на Македонија кон европскиот роаминг-простор, што во иднина би им овозможило на граѓаните да ги користат мобилните услуги во земјите од Европската Унија по исти цени како во државата.
Од партијата велат дека приклучувањето кон иницијативата „Роаминг како дома“ ќе значи поевтини повици, СМС-пораки и интернет за граѓаните, како и подобри услови за компаниите и прекуграничната соработка.
Посочуваат дека за таа цел се изработени четири гап-анализи за усогласување на домашното законодавство со европските директиви и регулативи во областа на електронските комуникации, по што бил подготвен и Предлог-закон за измени и дополнувања на Законот за електронски комуникации.
Според ВМРО-ДПМНЕ, Советот на ЕУ на 4 јуни годинава го одобрил почетокот на преговорите со земјите од Западен Балкан за проширување на иницијативата „Roam Like at Home“, што претставува формален почеток на процесот.
На 12 јуни, министерот за дигитална трансформација ќе учествува на состанок со министрите од регионот и претставници на Европската комисија, на кој ќе се разговара за следните чекори и подготвеноста на земјите за приклучување кон иницијативата.
Од владејачката партија оценуваат дека станува збор за конкретна мерка што ќе донесе практични придобивки за граѓаните и ќе ја потврди посветеноста на државата кон европската интеграција.
