ВМРО-ДПМНЕ преку соопштение обвини дека СДСМ и неговиот лидер Венко Филипче, додека биле на власт, не презеле соодветни мерки за решавање на случаите со небезбедна вода за пиење, ниту повикале на одговорност за, како што велат, утврдените пропусти.
Од партијата тврдат дека документи од извршени испитувања покажуваат оти и во периодот кога Филипче бил министер за здравство биле евидентирани случаи на небезбедна вода за пиење во повеќе населени места, меѓу кои и Гостивар.
„Наместо да го стават здравјето на граѓаните во прв план, тие не ги известиле граѓаните, не презеле мерки за решавање на проблемите и не повикале никого на одговорност“, наведуваат од ВМРО-ДПМНЕ.
Според партијата, во тој период ниту еден директор не бил разрешен, ниту биле поведени постапки за утврдување одговорност поради случаите со небезбедна вода за пиење.
Од ВМРО-ДПМНЕ оценуваат дека денес СДСМ се обидува да зборува за одговорност, иако, како што наведуваат, токму за време на нивното владеење не биле преземени конкретни чекори за санкционирање на пропустите.
Во соопштението се повикува Венко Филипче јавно да објасни кои мерки биле преземени за надминување на проблемите со квалитетот на водата за пиење и зошто, според нив, изостанала институционална одговорност.
