ВМРО-ДПМНЕ преку соопштение упати остри критики до лидерот на СДСМ, Венко Филипче, обвинувајќи ја опозицијата за ширење, како што велат, дезинформации и создавање паника кај граѓаните во врска со безбедноста на водата за пиење.
Од владејачката партија велат дека Филипче треба да се „прибере од одморот“ и со ироничен тон наведуваат дека долгата изложеност на сонце му предизвикала „сончаница и очигледна дезориентираност“.
„СДС изгуби компас, не знае каде тера, закажува настани, потоа ги презакажува, за на крај целосно да ги откаже“, наведуваат од ВМРО-ДПМНЕ.
Партијата го обвинува Филипче дека додека тој, според нив, престојува во Грција со Зоран Заев, неговите сопартијци во Македонија продолжуваат со, како што тврдат, ширење лаги и создавање страв и вознемиреност кај граѓаните.
Посебно се осврнуваат на состојбата со водата во Гостивар, тврдејќи дека надлежните институции ги презеле потребните мерки и дека последните испитувања покажале оти водата е безбедна за пиење.
„За нецели четири недели проблемот во Гостивар целосно се реши, а СДС, наместо да ги почитува официјалните резултати, продолжува со создавање сомнежи и паника и да бара документи“, велат од ВМРО-ДПМНЕ.
Од партијата се осврнуваат и на неодамнешните тврдења за водата во Скопје, оценувајќи дека тие биле демантирани со, како што наведуваат, релевантни податоци и докази.
ВМРО-ДПМНЕ порача дека граѓаните треба да бидат спокојни и дека водата за пиење во Гостивар и Скопје е исправна и безбедна, додека институциите продолжуваат да ја следат состојбата.
„На СДС и на Венко Филипче добронамерно им порачуваме, веќе е време да се соземат и што побрзо да се приберат од плажите по кои се распослани, затоа што предолгото изложување на сонце предизвикува сончаница и носи последици по здравјето“, стои во партиската реакција.
Од ВМРО-ДПМНЕ додаваат дека политичките несогласувања не треба да бидат причина за создавање дополнителна несигурност кај граѓаните, особено кога станува збор за прашања поврзани со водата за пиење и јавното здравје.
