ВМРО-ДПМНЕ обвини дека СДСМ и поранешниот премиер Зоран Заев ниту тогаш, ниту сега не ги негирале аудиоснимките во кои, како што велат, се слуша како бизнисменот Миодраг Давидовиќ – Дака зборува за давање пари и имот.
Од партијата тврдат дека поврзаноста меѓу тогашната власт на СДС и Давидовиќ – Дака била позната уште во 2020 година, кога во јавноста излегоа аудиоснимки.
„На снимките Дака се слуша како разговара со Зоран Милески – Кичеец и вели дека на Заев му дал 300 илјади евра и 2.000 метри квадратни земјиште“, наведуваат од ВМРО-ДПМНЕ.
Според нив, Милески бил посредник, а во разговорите, како што тврдат, се споменува и дека средствата биле искористени за изборен инженеринг за референдумот за името.
„Тоа што остана да лебди во воздухот е што ниту Заев, ниту СДС ги негираа овие снимки, што јасно потврдува дека тие биле точни и автентични“, велат од партијата.
Дополнително, посочуваат дека во истите разговори се споменува и името на поранешниот генерален секретар на Владата, Драги Рашковски.
Од ВМРО-ДПМНЕ оценуваат дека, како што велат, целата тогашна власт била поврзана со Давидовиќ – Дака, поради што, според нив, ги познава неговите фирми и бизниси.
„До денес нема никакво негирање или демантирање за овој случај од СДС и Заев. Тоа што на граѓаните им станува сè појасно е дека каде има криминал и корупција, таму се СДС, Заев и Филипче“, се наведува во реакцијата.
