ВМРО-ДПМНЕ реагираше на обвинувањата од СДСМ поврзани со случајот со загадената вода и прогласената епидемија во Гостивар, оценувајќи дека опозициската партија ја злоупотребува ситуацијата за собирање дневнополитички поени.
Од партијата велат дека на СДСМ и на лидерот Венко Филипче не им е приоритет заштитата на здравјето на граѓаните, туку политичката корист од актуелната состојба.
„СДС со очајни соопштенија се обидуваат да ја искористат ситуацијата во Гостивар за дневнополитички поени, наместо да дозволат институциите да си ја вршат работата, да се произнесат и да се утврдат фактите“, наведуваат од ВМРО-ДПМНЕ.
Во реакцијата се посочува дека надлежните институции веќе постапуваат во рамките на своите законски овластувања и дека евентуалната одговорност треба да се утврдува врз основа на докази, а не преку политички настапи.
„Во случајот со Гостивар, надлежните институции постапуваат согласно своите законски овластувања и секоја евентуална одговорност ќе ја утврдат надлежните органи врз основа на докази, а не врз основа на политички прес-конференции“, стои во соопштението.
ВМРО-ДПМНЕ потсетува дека локалната самоуправа има јасно утврдени надлежности во делот на водоснабдувањето и комуналните услуги, додавајќи дека доколку се утврдат пропусти, одговорност треба да има без оглед на политичката припадност.
Партијата воедно тврди дека СДСМ и Венко Филипче претходно повикувале да се поддржи актуелното раководство на Општина Гостивар, кое, според нив, го сочинува коалицијата ДУИ – СДС – Таравари.
„Обидите за префрлање на вината, без завршена истрага, претставуваат неодговорно политизирање на случајот од страна на СДС“, наведуваат од ВМРО-ДПМНЕ.
Во партиската реакција се додава дека ВМРО-ДПМНЕ останува на ставот оти секој што има законска или службена одговорност треба да сноси последици, но само доколку тоа биде утврдено од надлежните институции.
Реакцијата следува откако претходно СДСМ ја обвини Владата за, како што наведоа, институционални пропусти и побара политичка одговорност за случувањата поврзани со загадената вода во Гостивар.
