ВМРО-ДПМНЕ преку соопштение реагира на критиките од СДС за економските политики и јавниот долг, обвинувајќи ја опозициската партија дека треба да одговори за долговите направени во периодот кога заедно со ДУИ беше на власт.
Од владејачката партија велат дека во јуни 2024 година ја презеле одговорноста за Владата со јавен долг над 60 отсто од БДП, додека, според нив, денес тој изнесува 58,8 отсто од БДП.
„ВМРО-ДПМНЕ ја презеде одговорноста да ја води Владата во јуни 2024 година со јавен долг над 60 проценти од БДП. Денес долгот изнесува 58,8 проценти од БДП, односно е понизок од затекнатото ниво, со тоа што Владата уредно ги сервисира обврските што ги наследи“, наведуваат од партијата.
ВМРО-ДПМНЕ тврди дека во наредните години доспеваат околу осум милијарди евра долгови, за кои вели дека биле преземени во времето на СДС и ДУИ. Од партијата наведуваат дека во 2026 година доспеваат околу 1,5 милијарди евра, во 2027 уште 1,5 милијарди, во 2028 година 1,9 милијарди, во 2029 година 1,3 милијарди и околу 1,4 милијарди евра во 2030 година.
Од ВМРО-ДПМНЕ го повикаа СДС да одговори и за, како што наведуваат, 4,5 милијарди евра со кои државата била задолжена за седум години и прашаа за што биле потрошени тие средства.
„Ако сакаат да зборуваат за економија нека зборуваат со официјални бројки, но тоа не им одговара оти бројките не се на нивната страна на водење лажни кампањи“, велат од ВМРО-ДПМНЕ.
Владејачката партија се повика и на податоците за економскиот раст, наведувајќи дека економијата во вториот квартал од 2026 година пораснала за 4,3 отсто. Од ВМРО-ДПМНЕ додаваат дека економијата бележи раст од над три отсто осум квартали по ред.
Од партијата направија споредба и со периодот на претходната власт, наведувајќи дека просечниот економски раст во времето на СДС и ДУИ бил околу 2,6 отсто, без оглед на годините на пандемијата со КОВИД-19.
„Затоа наместо СДС да ги извртува фактите, време е да одговори за долговите, потрошените милијарди и сметката што ја остави зад себе“, се наведува во реакцијата на ВМРО-ДПМНЕ.
