ВМРО-ДПМНЕ преку соопштение обвини дека СДСМ, Левица и ДУИ го блокираат реформскиот процес во државата и не го поддржуваат донесувањето на измените на Изборниот законик.
Од партијата тврдат дека претставниците на опозициските партии учествувале во подготовката на законските измени и дека нивните забелешки биле прифатени и вградени во конечниот текст, но дека на крајот го блокирале неговото усвојување.
Според ВМРО-ДПМНЕ, ваквиот однос покажува дека за опозицијата не е приоритет исполнувањето на реформските обврски, туку, како што наведуваат, политичкиот профит од создавање застој во процесите.
Во соопштението се наведува дека на опозициските партии им било понудено дополнително да ги внесат своите предлози во текстот на законот, но тие, според ВМРО-ДПМНЕ, не ја прифатиле таа можност.
Од владејачката партија порачаа дека реформите ќе продолжат и покрај, како што велат, блокадите и опструкциите, додавајќи дека граѓаните ја препознаваат разликата меѓу политиките на власта и на опозицијата.
Изнесените ставови и обвинувања се на ВМРО-ДПМНЕ. До моментот нема реакција од СДСМ, Левица и ДУИ во врска со овие наводи.
