ВМРО-ДПМНЕ обвини дека СДСМ, ДУИ и Левица координирано го блокираат донесувањето на новиот Изборен законик и дека нивното јавно несогласување е, како што велат, политички театар со однапред договорен исход.
Од владејачката партија тврдат дека пред јавноста станало јасно оти трите опозициски партии немаат намера да постигнат договор за новите изборни правила.
„Лошиот политички театар на СДСМ, ДУИ и Левица е разоткриен. Едните јавно повикуваа на разговори, другите демонстративно ги одбиваа, а во суштина сите работат за ист исход – да нема договор“, соопштија од ВМРО-ДПМНЕ.
Според партијата, СДСМ, ДУИ и Левица немаат интерес да се усвојат современи изборни правила и да се олесни гласањето на македонската дијаспора.
„Наместо реформи, тие избираат блокади, калкулации и политички пресметки. Причината е јасна – подготовка на сопствено алиби за следниот изборен циклус“, наведуваат од ВМРО-ДПМНЕ.
Во соопштението се додава дека, според нив, по евентуалниот изборен пораз, партиите ќе се повикуваат на различни причини, како препораките на ОБСЕ и ОДИХР, условите за изборната кампања или наводно непочитување на волјата на граѓаните.
„Тоа се изговорите што однапред ги подготвуваат затоа што немаат аргументи“, порачаа од ВМРО-ДПМНЕ.
