Земјоделците повторно ќе можат да ги користат финансиските средства од ИПАРД програмата, соопшти ВМРО-ДПМНЕ.
Од партијата во соопштението наведуваат дека Владата навремено реагирала и го активирала националниот механизам поврзан со случајот во Агенцијата за финансиска поддршка во земјоделството, по што била побарана вонредна контрола од Европската комисија.
Според нив, деталната контрола покажала дека нема неправилности во постапките и дека системот функционира правилно, поради што средствата повторно се ставени на располагање, стои во соопштението.
ВМРО-ДПМНЕ тврди дека Брисел никогаш не ги блокирал средствата, спротивно на тврдењата на опозицијата, која ја обвинува за ширење неточни информации кон земјоделците.
Од партијата додаваат дека нивниот пристап бил насочен кон транспарентност, соработка со европските институции и заштита на средствата наменети за земјоделците, оценувајќи дека со тоа се демантирани, како што велат, обвинувањата од СДС.
