ВМРО-ДПМНЕ преку соопштение го обвини лидерот на СДСМ, Венко Филипче, дека во недостиг на политичка понуда и визија прибегнува кон, како што велат од партијата, создавање тензии и инциденти.
Од ВМРО-ДПМНЕ оценуваат дека Филипче е „политички импровизатор и бледа копија на Заев“, обвинувајќи го дека продолжува со политики кои, според нив, се насочени кон создавање поделби и тензии.
Во реакцијата се наведува дека СДСМ нема понуда за, како што велат, реалните проблеми на граѓаните, па наместо тоа се свртел кон „импровизации, глумење жртви и креирање насилни инциденти“.
Од ВМРО-ДПМНЕ тврдат дека јавноста ги видела лицата на лицата кои, според нив, биле испратени да предизвикаат инцидент во Ново Село за време на посетата на премиерот Христијан Мицкоски.
Партијата ги обвинува Ефтимов и Стојанов дека се лица со криминално досие и дека биле условно осудени на казна затвор од една и пол година поради напад врз туристи во Струмица. Од ВМРО-ДПМНЕ тврдат дека токму поради тоа тие биле избрани за учесници во настанот.
„Криминалци, тепачи, насилници и наркомани, тоа е матрицата на СДС која Филипче ја претставува како „децата“ на Македонија“, стои во реакцијата на ВМРО-ДПМНЕ.
Од партијата додаваат дека таквата политика, според нив, не може да биде иднината на државата.
