ВМРО-ДПМНЕ преку соопштение соопшти дека Владата во изминатите две години реализирала и започнала повеќе од 60 спортски проекти, со вкупна вредност поголема од 21 милион евра, со цел подобрување на спортската инфраструктура низ државата.
Од партијата наведуваат дека инвестициите се насочени кон создавање подобри услови за развој на спортот, младите и рекреативците, како и кон поттикнување на нови спортски успеси.
Според соопштението, во изминатиот период се реконструирани и започнати повеќе капитални проекти, меѓу кои спортската сала „Расадник“, атлетските патеки во Велес и Гевгелија и спортската сала во Радовиш.
Во тек се и реконструкцијата на спортската сала на УКИМ, изградбата на нови спортски сали во Општина Аеродром, Крушево и Воената академија во Скопје, како и изградбата на нови трибини на градскиот стадион во Тетово.
Од ВМРО-ДПМНЕ велат дека со овие инвестиции се создаваат современи и безбедни услови за спортување, се поттикнува развојот на врвниот спорт и се отвораат можности за организација на спортски настани што ќе придонесат и за локалниот економски развој.
Партијата додава дека Владата ќе продолжи со капиталните вложувања во спортската инфраструктура, оценувајќи дека тие претставуваат долгорочна инвестиција во здрави генерации и во развојот на македонскиот спорт.
