ВМРО-ДПМНЕ преку соопштение реагираше на обвинувањата од СДС, оценувајќи дека Владата навремено и ефикасно се справува со кризата предизвикана од загадувањето на водата во Гостивар.
Од партијата наведуваат дека, за разлика од, како што велат, кадрите на СДС, ДУИ и Алијансата за Албанците предводена од Арбен Таравари, актуелната Влада презела брзи мерки за надминување на состојбата и за помош на граѓаните.
Според ВМРО-ДПМНЕ, преку Службата за општи и заеднички работи секојдневно се доставуваат повеќе од 60 тони вода за пиење и за технички потреби, додека Институтот за јавно здравје и Министерството за здравство веднаш издале препораки и мерки за постапување.
Во соопштението се наведува дека Министерството за внатрешни работи ги привело и притворило осомничените лица и дека се прибираат докази кои ќе бидат доставени до Јавното обвинителство. Од партијата додаваат дека паралелно се работи и на отстранување на причините за загадувањето, со цел водата што е можно побрзо повторно да може да се користи, најпрво за технички потреби.
ВМРО-ДПМНЕ очекува обвинителството и судството целосно да го расчистат случајот и да ја утврдат одговорноста, при што во соопштението прави споредба со, како што наведуваат, случајот со модуларната болница од пред неколку години.
Од партијата оценуваат дека разликата меѓу ВМРО-ДПМНЕ и СДС е во начинот на справување со кризните ситуации, тврдејќи дека актуелната Влада презема конкретни мерки, додека опозицијата, според нив, се занимава со политички обвинувања.
